Esti segundu trimestre del añu van programase 108 proyeiciones en Xixón y n’otros 20 conceyos gracies a la Cinemateca Ambulante con protagonismu del cine européu y una sesión colos meyores curtios asturianos nos 10 años d’esta iniciativa
El vienres va arrancar la programación del segundu cuatrimestre de Llaboral Cinemateca cola proyeición nel Paraninfu de la Llaboral de ‘Love letters’, filme francés dirixíu por Alice Douard. Ye la primera de les 108 proyeiciones previstes en Xixón y n’otros 20 conceyos a los que llega la Cinemateca Ambulante, que yá’l xueves tien previstes sesiones en Tinéu (‘Las líneas discontinuas’) y Llanes (‘Volver a casa tan tarde’). Una cartelera variada y interentasante pa llevar el cine per toa Asturies.
A Xixón va llegar el meyor de firma europea, con ésitos de públicu y crítica, y la ‘Muestra Asturies’, que va incluyir dos llargometraxes asturianos estrenaos mundialmente nel Festival Internacional de Cine de Gijón/Xixón (FICX), como ‘La imperfección y la paciencia’, d’Álex Zapico, y ‘La Placa, una familia de bien’, de José Antonio Quirós. El documental ‘Volver a casa tan tarde’, que dirixe Celia Viada, completa la presencia asturiana esti cuatrimestre xunto a los curtiometraxes que van formar parte de la sesión ‘Lo meyor de Llaboral Cinemateca Curtios. 10 años de Cortos Asturianos’, el domingu 10 de mayu a les 19 hores, con ‘No Jungle!’, de Carmen Menéndez; ‘Ciruela de agua dulce (Sunken Plum)’, de Roberto F. Canuto y Xu Xiaoxi; ‘El diañu’, de Samuel Fernandi; ‘Beyond The Glacier’, de David Rodríguez Muñiz; ‘Gniele baila’, d’Ana Izarzugaza; y ‘Vas a ser mi memoria siempre’, de Marina Munárriz.
Les entraes pa les proyecciones nel Paraninfo de la Llaboral yá tán disponibles a un precio xeneral de 4 euros y reducíu de 3 pa socios del Club Cultura Asturies y del Carné Mozu Asturies, usuarios del Pasaporte Cultural y miembros de la comunidá de la Universidá d’Uviéu. La sesión con banda sonora orixinal en direuto cuesta 14 euros, 12 reducíu, mientres que ‘Lo meyor de Llaboral Cinemateca Curtios. 10 años de Cortos Asturianos’ ye de baldre, anque ye necesario retirar invitación. Pue consultar el programa completu de Llaboral Cinemateca y Cinemateca Ambulante, iniciatives de la Conseyería de Cultura, Política Llingüística y Deporte, calcando nesti enllaz.
