El soníu de la gaita yá toma’l Recintu Ferial d’Asturies Luis Adaro p’animar la gran espicha de Xixón cola sidra nuevo de Germán como bébora oficial; conciertos d’Ún de Grao o Rollu Folk, tasties, xuegos tradicionales y actividaes infantiles prográmense hasta’l domingu
La Selmana Santa ye sidrera en Xixón dende va más de quince años. La Primer Sidre l’Añu, que llega a la so decimosesta edición, consolidóse como la cita principal na ciudá d’estos díes festivos, axuntando a miles de persones pa disfrutar de la sidra nuevo, ensin trasegar. L’añu pasáu foron 10.000 na primera vez nel Recintu Ferial d’Asturies Luis Adaro, que repite como sede de cuatro xornaes d’espicha, cultura, tradición y folixa qu’arrancaron a les 13 hores de güei.
La reivindicación nun faltó na inauguración del eventu, centrada na llucha contra la comunicación, como amuesa la invitación fecha pola organización, la Fundación Asturies XXI, a la Plataforma contra la Contaminación de Xixón, encargada de lleer el pregón, y a l’Asociación Vecinal La Calzada Alfonso Camín, que ta lliderando les movilizaciones pa esixir la salida de camiones de Cuatro Caminos. L’actu siguió cola entrega de los premios del concursu pa escoyer a la Meyor Primer Sidre l’Añu del 2026, final que tuvo llugar el miércoles pasáu en La Montera Picona de Ramón, col llagar avilesín Germán como ganador, polo que ye la sidra oficial d’esti añu. En segundu puestu quedó Contrueces (Xixón) y en terceru, La Morena (Siero), que tuviera esi honor nel 2024 y 2025.
Alejandra Vanegas, de La Montera Picona de Ramón, echó el culín inaugural, al que siguió otro coleutivu cola Buena Cofradía de los Siceratores de Asturias y representantes de les asociaciones convidaes, mientres que la barra con decenes de palos diferentes entamó a recibir a los primeros visitantes que, dende entós, vienen animando’l recintu. Éstos pueden disfrutar d’un ampliu programa d’actividaes qu’inclúin dende una tastia guiada de les meyores sidres del concursu a una preba de choscu de Tinéu o un taller d’escanciáu, amás d’actividaes pa la reciella, como mayáu de mazana, o xuegos tradicionales pa toles edaes.
Como novedá d’esta edición, tornen los conciertos al Primer Sidre l’Añu, actividá qu’abre esta tarde a les 19 hores Ún de Grao. Mañana va ser el turnu de Soi Panderetera y el sábadu, de Rollu Folk. La entrada al recintu ye de 10 euros, cola posibilidá de prebar tola sidra que quiera de los llagares participantes y participar en tolos eventos programaos, y l’horariu d’apertura de 13 a 21 hores, güei; de 12 a 21, mañana y sábadú, y de 12 a 17 hores, el domingo.
