Xixón nun escaez a Redondo y a Medio: Felpeyu, Llan de Cubel o Kactus Jack toquen na Plaza Mayor na so alcordanza

La música asturiana torna a recordar a dos de los sos referentes nel venti aniversariu de la so muerte nun accidente de tráficu cuando diben a tocar cola so banda Felpeyu a Cataluña; el folk va ocupar dende les 16 hores l’escenariu y el rock, dende les 19.30

Ígor Medio y Carlos Redondo son dos nomes que nunca cayeron nel escaezu. Dos persones que contribuyeron a la escena folk y rock asturiana con so trabayu y talentu y que, magar pasaren venti años dende lo so perda naquella tráxica Nueche de San Xuan del 2006, caltienen el ciñu d’aficionaos y músicos, siempre dispuestos a collaborar en cualquier homenaxe a la so figura .Güei seis bandes, cuatro d’equí y dos de fuera, participen nun nuevu Festival N’Alcordanza col que Xixón —que recientemente dio’l so nome a una cai nel so barriu, El Natahoyo, la vieya Palafox—y los xixoneses van tornar a recordalos.

Va ser esta tarde na Plaza Mayor, como previu al Festival Arcu Atlánticu que va a echar a andar oficialmente’l llunes,con dos estayes diferenciaes. Va entamar primero, a les 16 hores, el folk con un conciertu de la banda que sirvió de referente a Felpeyu y a toles demás, Llan de Cubel, pa siguir a les 17.10 colos gallegos Hermanos Castro, fundadores en Salamanca de la banda xunto con Medio y Ruma Barbero, y terminar a les 17.50 hores cola formación actual del grupu col que tanto Medio como Redondo tocaben cuando perdieron la vida na carretera n’Euskadi camín de Cataluña pa tocar nel Festival de Música Tradicional i Popular de Calaf. El rock va sonar dende les 19.30 con Radio Fox, banda tributu a Los Locos, tríu referente nos 80 nel que participó dende la so creación Redondo, pa después dar pasu a los andaluces Jaguares de la Bahía (20.45 horas) y a los históricos Kactus Jack (21.45). Una tarde pa la historia de la música asturiana.

PUBLICIDAD