Esti vienres ye la gran fiesta de la lliteratura asturiana, cola xunta estraordinaria de l’Academia de la Llingua Asturiana (ALLA) nel teatru uvieín como eventu central y Berta Piñán, que va recibir el IV Premiu Nacional de Lliteratura Asturiana, como protagonista
Asturies celebra un añu másel Día de les Lletres Asturianes, xornada que pon en valor la creación lliteraria en llingua asturiana y eonaviego, y na que Berta Piñán va ser reconocida col IV Premiu Nacional de Lliteratura Asturiana, gallardón triañal en vida de l’Academia de la Llingua Asturiana (ALLA) a una trayeutoria qu’hasta’l momentu recibieron Xuan Bello (2017), Xuan Xosé Sánchez Vicente (2020) y Lourdes Álvarez (2023). Va ser na xunta estraordinaria de la institución, que va tener llugar a les 19 hores nel uvieín Teatru Campoamor cola presencia de los principales representantes políticos, ente ellos el presidente Adrián Barbón, y que va poder siguise en direuto per RTPA.
El xuráu del premiu destacó de Piñán la «calidá d’un facer lliterariu que percuerre’l panorama asturianu de los caberos cuarenta años y nel que destaca la fondura d’una poesía sentida, sensible, abierta a los problemes cotidianos y del mundu y d’una bayurosa orixinalidá». Parte de la mesma recuéyese nuna edición conmemorativa non vendible que forma parte del gallardón. El discursu institucional de González Riaño será l’otru momentu principal d’un actu que va pesllar el Coro Minero de Turón con una actuación.
Día del Llibru Asturianu
Coincidiendo con esta xornada, la Conseyería de Cultura, Política Llingüística y Deporte, qu’entama estos díes la XLVII Selmana de les Lletres Asturianes, organiza el Día de Llibru Asturianu, con un 10 % cientu de descuentu na compra de llibros y discos n’asturianu y eonaviego y la entrega de baldre de la obra conmemorativade esta edición, ‘De viva voz. Taresa Cónsul y el teatru asturianu’, coodinada por Dolfo Camilo Díaz y Laura Iglesia, o, nel casu del idioma del occidente, ‘Cásasenos a nena’ de Manuel García Galano.
Mediu centenar de llibreríes de 14 conceyos participen nesta iniciativa. Pue consultar el llistáu enteru nesti enllaz.
