La conseyera Eva Ledo, «énte lo avanzao que va’l Real Decretu» de modificación de los decretos d’especialidaes en Madrid, entama la xestión p’abrir, nel momentu que se publique nel BOE, la consulta pública previa del autonómicu que los regulará
Col pasu pel Conseyu d’Estáu como única etapa pendiente enantes de la so aprobación definitiva pol Conseyu de Ministros, la Conseyería d’Educación pon en marcha tola maquinaria pa contar coles especialidaes de Llingua Asturiana y Gallego-asturiano lo más pronto posible. La so titular, Eva Ledo, confirmó ayer que «visto lo avanzao que ta, dende la nuesa comunidá vamos entamar tamién los trabayos pa xestionar, tan pronto tengamos nel BOE publicáu esti Real Decretu, la tramitación normativa que posibilitará que nosotros tengamos un decretu d’especialidaes».
Asina, «vamos entamar cola xestión p’abrir la consulta pública previa del decretu pol que se va regular l’asturianu y l’eonaviego, na que tolos ciudadanos que lo deseen van poder emitir les aportaciones que debemos tener en cuenta una vez que podamos principiar col so desendolcu y tramitación». La modificación en Madrid de los tres decretos d’especialidaes (Primaria, Secundaria y Escueles Oficiales d’Idioma), demanda vieya de la comunidá educativa y del Gobiernu asturianu, va permitir que les autonomíes que cuenten con llingua propia non oficial pero reconocida nos sos estatutos, casu d’Asturies, Castilla y Lleón o Aragón, puedan crear especialidaes docentes si lo consideren. Nel nuesu territoriu son más de 300 los maestros y maestres que s’atopen nuna situación de precariedá llaboral que se caltién dende’l comienzu de la escolarización en Llingua Asturiana nel añu 1984.
