Gloria Pintueles, Kela Coto, Montoya y Fueyo, asturianes escoyíes pa les residencies artístiques ‘El Palacio’

La Comisión de Valoración seleicionó un total de 10 proyeutos, el máximu posible, d’ente los 306 presentaos nesta tercer edición de la convocatoria; les estancies, d’hasta cinco meses, van desendolcase na instalación de Contrueces ente setiembre y xunu

Diez artistes de dientro y fuera d’Asturies van disfrutar d’una estancia nel Palaciu de San Andrés, en Contrueces, pa desendolcar un proyeutu creativu. Ye’l máximu posible qu’afita la convocatoria del programa ‘El Palacio. Residencies Artístiques y Aición Cultural 2026-2027’ de la Fundación Municipal de Cultura, Educación y Universidad Popular, que, na so tercer edición, recibió la cantidá récor de 306 propuestes. Un duru trabayu pa la Comisión de Valoración, aconceyada’l xueves pasáu, que tuvo formada por Aitor Martínez Valdajos, Semíramis González Fernández, Ane Rodríguez Armendariz, Pablo Molero, Jimena Rodríguez Fernández y Camino Balbín, con Henar Díez Robla como secretaria.

A la hora de facer la escoyeta, les bases del programa marcaben qu’a lo menos un 30 % de los seleicionaos debíen ser asturianos o tener raigón na comunidá. Asina, les xixoneses Gloria García Pintueles, con ‘Alguien recordará. Genealogías de un archivo imposible’; Ángela ‘Kela’ Coto, con ‘Materia frágil de la interzona’; Marina Fueyo, con ‘El valle de acero’; y la granadina Paula Montoya, con ‘A tientas’, foron les artistes de la tierra que convencieron a los miembros de la Comisión de Valoración, que también tuvieron que tener en cuenta que’l 30 % de los residentes habríen ser creadores emerxentes, esto ye, menores de 35. Esta condición cúmplenla Pintueles, Montoya, Fueyo y Romina Analía Casile, que presenta ‘Diario de una obradora’, y Eladio Aguilera, col so proyeutu ‘El espíritu de las formas’.

Completen el llistáu de residentes Marc Vives, con ‘Zazazazaza’; Raquel Buj, con ‘Ser tarugo. Arquitecturas de desgaste entre cuerpo y territorio’; Tania María Garrido, con ‘Columna [VΛCΛ]’; y María Amparo Gomar, con ‘Higiene moral’. Los 10 seleicionaos desenvolverán los sos proyeutos ente setiembre y xunu na instalación de Contrueces nun espaciu de trabayu compartíu, con dotaciones de 3.500 euros pa la producción de la idea y 750 euros mensuales como honorarios. Les estancies tienen un llargor d’ente 1 y 5 meses, polo que’l máximu a recibir polos artistes ye de 7.250 euros.

L’oxetu del programa ‘El Palacio. Residencies Artístiques y Aición Cultural 2026-2027’ ye sofitar el desendolcu y la producción de proyeutos artísticos, d’investigación y de mediación n’artes plástiques y visuales, artes escéniquesy performance, arte sonoru, arte dixital, creación lliteraria, de comisariáuy d’investigación, ode mediación cultural yinvestigación n’educación artística.

PUBLICIDAD