Granda abre les Fiestes de Santana con alcordances y muncha emoción

Francisco Miravalles ‘Paco La Carbayera’ lleó’l pregón que da entamu una celebración que va tener a Nicolás García Rendueles y Candela Sánchez Rodríguez como Trasgu y Xana; la sidra y un pinchéu animaron la primer xornada, na que s’entonó el «sí, sí, sí, Santana ya está aquí»

Había ganes de celebración. El llar social de Granda quedó pequeñu pal primer actu de les Fiestes de Santana: la llectura del pregón, honor qu’esti añu tuvo Francisco Miravalles, conocíu como Paco’l de La Carbayera por ser propietariu del popular establecimientu hosteleru. Una intervención enllena d’alcordances, na que’l pregoneru recordó su llegada a Granda y l’entamu del negociu familiar, detalló la conexón que tien cola parroquia y los sos vecinos, y el so sentimientu hacia la romería. La emoción tamién tuvo presente ente’l públicu mientres la proyeición nel videu ‘Legado’ fechu pola Comisión de Fiestes cola participación de mayores del llugar, pieza audiovisual que sirve pa reivindicar la romería tradicional.

Nel actu escóyose amás al Trasgu y la Xana d’estes fiestes, que van ser Nicolás García Rendueles y Candela Sánchez Rodríguez, y entregóse un recuerdu a Laura Martínez, ganadora del logu qu’ilustra’l la camiseta d’esti añu. Pa finar, entamóse un pinchéu acompañáu de sidra nel que nun faltó el «sí, sí, sí, Santana ya está aquí» cantáu en comuña.

Esta tarde siguen les actividaes cola X Arrancadera, una ‘jira’ al área recreativa de Granda, onde se va habilitar un aparcamientu, que va entamar a les 18 hores. Families y amigos, organizaos por peñes, que participen nel concursu de coreografíes, van llevar la merienda y a compartir la tarde nun ambiente festivu.

PUBLICIDAD