La gran espicha nel Recintu Ferial d’Asturies Luis Adaro sigue esti sábadu y domingu con música, concursos, tasties y muncha sidra depués de dos díes de gran ambiente; la procesión sidrera de Vienres Santu llegó esti añu a Avilés nuna edición con llista d’espera, polo que la organización estudia ampliar places
Nun ye cuestión imprescindible pa disfrutar d’una espicha si hai ú abellugase, pero ta claro qu’ayuda. El bon tiempu acompaña la Selmana Santa xixonesa y convierte la esperiencia de la Primer Sidre l’Añu en muncho más agradable de lo que por sí mesmo ye. Y eso traduzse en munchos visitantes nel espaciu acutáu xunto al Pabellón d’Asturies del Recintu Ferial Luis Adaro pa xugar a la llave, baillar, charrar y, yá dientro, prebar la sidra nuevo, ensin trasegar, d’un piñu de llagares. Una esperiencia enllena d’asturianía recomendable pa los d’equí y pa los de fuera.
Güei y mañana va continuar esti eventu que pretende recuperar les espiches pa Selmana Santa tan habituales tiempu atrás n’Asturies, con un ampliu programa a la espera del XV Concursu de Sidre Casero Fecho en Maera, convocáu pa mañana. A les 19 hores va animar la folixa Rollu Folk, pero l’animación tamién va ponela l’ayerana Banda Gaites El Gumial. Los visitantes van poder averase a tasties de les sidres ganadores del Meyor Primer Sidre l’Añu del 2026, esto ye, Germán, Contrueces y La Morena (15 hores), o de sidra irlandesa (17 horas); a la presentación del llibru ‘Cultura asturiana de la sidre’, con Llucía Fernández Marqués (16 hores); o al taller d’escanciáu con Nicolás Expósito (17.30 hores), ente otres. L’horariu d’apertura ye de de 12 a 21 hores, de 12 a 17 mañana, y el preciu de la entrada ye de 10 euros, con derechu a participar en toles actividaes programaes y a prebar tola sidra que se quiera de los llagares participantes.
Visita a Germán
Venceyada dende un primer momentu a la Primer Sidre l’Añu, entamóse un Vienres Santu más el Sidracrucis, una gran procesión sidrera de gran demanda, como amuesa que, un añu mas, quedara llista d’espera pa participar nella, lo que lleva a la organización a estudiar una ampliación de places pa ediciones próximes o, inclusive, facer iniciatives asemeyaes a lo llargo del añu. Nesta ocasión la pasión sidrera llegó tamién a Avilés, onde, depués de xintar na espicha de la Feria, visitóse Sidra Germán, ganador d’esti añu a la Meyor Primer Sidre l’Añu, con muestra de les instalaciones y pinchéu na terraza incluyíu, y Villalegre, con parada en Yumay, con sidra El Gobernador, y La Ruta y La Estación, con JR.
La partida fora yá pela mañana dende la sede de la revista ‘La Sidra’, coles primeres ‘estaciones’ na Sidrería Chaflán, con Sidra Castañón; Casa Juan, con Sidra Llagar de Quintana; y La Montera Picona de Ramón, con Sidra Menéndez. En toos ellos, al igual que nel restu de paraes del Sidracrucis, con pinchos abondos pa forrar. Una espicha n’El Mallu d’Avilés peslló esta edición de la siempre animada pasión sidrera que tanto engancha a los que s’atreven a vivila.
