El bon facer

«Nun ye un trabayu cómodu y, en delles ocasiones, tuvi la (falsa) sensación d’invadir la intimidá de les families»

Ún, pa ser médicu, tien de pasar per munchos y estremaos caminos, trabayar n’abondes disciplines y estudiar milenta estayes si quier algamar l’estatus d’especialista. Nun ye cenciello construyir un abellugu onde l’enfermu pueda afayase, anque non siempre podamos curialu. «Curiar dacuando, alliviar davezu, consolar siempres». 

Yo, qu’escoyí una especialidá mui completa, como ye la medicina interna, percuerro diferentes servicios y fasteres pa deprender de caún tolo que pueda sirvime p’ayudar a la xente y algamar un ampliu conocimientu médicu. Y medro acaldía colo que munchos amigos y collacios m’aprenden gracies al so bon facer.

PUBLICIDAD

Nes últimes semanes tuvi la suerte de collaborar y deprender con y d’un grupu de xente que trabaya col enfermu na fase final de la so vida; y, amás, failo con xeitu y cola ilusión de quien sabe que l’ánimu del paciente esi día puede tar venceyáu a unes palabres, a unos xestos y unos cuidaos que-y ufren estes persones. 

Nel Hospital de Cagüeñes, na planta -1, hai un despachu onde se preparen melecines, dibúxense mapes p’aportar a una cai qu’entá nun conocen y fálase de cómo poder quita-y el dolor (el físicu y el psíquicu: la medicina va más allá de la carne) a eses persones que tean nuna mala situación. Esti serviciu llámase Hospitalización a domiciliu y trata delles enfermedaes nel llar del paciente, ufriéndo-y la posibilidá de tar en casa, arrodiáu de los sos familiares. Nesti tiempu, conocí abondes persones que, en diferentes momentos, necesitaron un tratamientu pa una infeición o pa escaecer el dolor que-yos producía un cáncanu, y recibieron per parte de los médicos y enfermeres el meyor tratu y cariñu. Consolar siempres.

Nun ye un trabayu cómodu y, en delles ocasiones, tuvi la (falsa) sensación d’invadir la intimidá de les families; sicasí, na mayor parte del tiempu estes abríen les puertes de casa con gayola y ilusión porque sabíen que díbemos echar un gabitu en tolo que pudiéramos. Ves l’agradecimientu nos güeyos de pacientes y familiares, y eso da puxu pa siguir na xera. Ye por ello que nel añu 2011 el serviciu recibió la Medalla de Plata de Xixón, un reconocimientu a un llabor perimportante, a una dedicación al traviés de los años y les vides de miles de xixoneses.Sirvan estes palabres p’agradecer pela mio parte tamién a Belén, Gerardo, Carlota y a tol equipu d’enfermería (¡sois munches y mui bones!) tolo que me tresmitistis, tanto de conocimientu como d’humanidá, y el gran trabayu que facéis tolos díes polos enfermos (y les families) d’esti conceyu.