Xosé Antón González Riaño, presidente de l’Academia de la Llingua Asturiana (ALLA), señala la importancia de que tenga «una sensibilidá especial cola cuestión llingüística»; Iniciativa pol Asturianu defende «el talentu qu’hai n’Asturies» y pide que s’aproveche la «puerta abierta» al idioma que dexa’l mandatu-marcu
Güei fina’l plazu pa la presentación de candidatos pa ocupar el cargu de direutor xeneral de RTPA qu’ocupaba en funciones dende 2019 Francisco González Orejas, que decide xubilase, y paez que nengún partíu va poner un nome enriba la mesa. La FSA-PSOE, que manexaba’l del periodista navarru de 42 años Daniel Forcada, descarta finalmente esta posibilidá llueu del refugu que provocó’l so perfil, al nun contar con venceyu de nengún tipu con Asturies, y pidirá na Xunta de Voceros que s’amplíe’l plazu. Poro, sigue la busca d’una persona que s’encargue de poner unes bases pal futuru del ente autonómicu de comunicación nun momentu clave y aplique’l mandatu-marcu aprobáu’l branu pasáu pa los 8 años vinientes.
El sociu de Gobiernu Convocatoria por Asturies (IX-Más País-IAS), Foro y Covadonga Tomé, diputada eleuta por Podemos, formaciones qu’amuesen una sensibilidá especial pa colo asturiano na Xunta Xeneral, dexaron bien nidia la so posición depués de que miGijón espublizase’l nome del candidatu socialista, Daniel Forcada: el direutor xeneral de RTPA habría conocer «bien la realidá d’Asturies». Una posición que comparte l’Academia de la Llingua Asturiana (ALLA). El so presidente, Xosé Antón González Riaño, espresa que «hai que pensar nuna persona que sía mui consciente de lo que ye Asturies dende un puntu de vista social y cultural; dende’l puntu de vista históricu, de la tradición d’esta comunidá autónoma. Y dende ahí, tien que tener unes carauterístiques de respetu, de consideración, de sensibilidá y de convicción, que ye mui importante, sobre’l papel que tiene que xugar la televisión na normalización del asturianu». En definitiva, «una sensibilidá especial en rellación cola cuestión llingüística y cultural».
Ensin querer entrar a valorar nomes, el caderalgu de Didáutica de la Llingua y la Lliteratura de la Universidá d’Uviéu apunta que «seguramente hai distintes persones qu’encaxen con esi perfil o con eses característiques. Nosotros nun queremos entrar ehí en más consideraciones, pero tenemos claro y, dende llueu, nosotros defendemos, que nun sería creíble una presencia digna del asturianu na televisión ensin un direutor o una direutora que cumpliera con eses mínimes premises de compromisu con Asturies, cola llingua y cola cultura». Y ye que dende l’ALLA reivindiquen como ún de los llogros «que necesariamente se tien que dar al final de la llexislatura ye’l d’una presencia digna, visible socialmente, del asturianu na televisión, fundamentalmente n’espacios informativos», pola importancia que tien l’ente na normalización del idioma. Nesi sen, demanda «una dirección de Conteníos n’Asturianu que verdaderamente planifique cuál tiene que ser el papel del asturianu na televisión».
Sorpresa pola propuesta socialista
Dende la organización Iniciativa pol Asturianu, la so presidenta Arantza Margolles señala al respeuto del candidatu socialista que «con tol talentu qu’hai n’Asturies y con tolos bonos periodistes que pueden tar ehí, sorprendiónos porque nun entendíemos qué rellación tenía esta persona, que de xuru que ye un gran profesional, con Asturies, nin cómo diba comprender la realidá asturiana, non sólo no llingüístico, sinón a nivel xeneral», esplica. La historiadora valora que «el mandatu-marcu que tenemos agora ye verdá que toca un poco perriba la cuestión llingüística, pero dexa la puerta un poco abierta y lo que queremos ye qu’esi candidatu tire esa puerta abaxu y puxe por conteníos n’asturianu. Pero non sólo n’asturianu, sinón por conteníos qu’arriquezan, que ye lo que tien que facer una televisión pública».
«Tanto na radio como na tele consideramos que tien qu’haber munchísima más cantidá de conteníos n’asturianu. Y la mayor normalización que pueda haber ye que tea presente n’informativos; pero que tea presente por un mandáu de la RTPA, non pol enfotu de trabayadores, como asocede agora na radio», añade.
