«Esiste namás l’Asturies turística, y la so capital ye Xixón, qu’entós yá nun puede axudicase a sigo mesma los axetivos de disidente o heterodoxa. Xixón, agora, ye la ortodoxia, la norma, el patrón; modelu, sí, pero de lo oficial, del orde establecíu»
Cuando se chapotea nos periódicos de la Restauración en busca de referencies a Asturies -como ta faciendo estos meses esti qu’escribe, consagráu a la so tesis doctoral sobro discursos y usos políticos del mitu de Covadonga nesi períodu-, ye habitual atopase la espresión d’un contraste. Sorrayábase de cutiu qu’había dos Asturies: l’Asturies de Cuadonga y la de Xixón. Cuadonga yera la tradición, el desván de les xestes polvorientes del pasáu y les sos evocaciones autocomplacientes: el vieyu que cunta batallines a los nietos. Y Xixón -dacuando Mieres o La Felguera, pero sobremanera Xixón- yera l’Asturies nueva, palpitante, activa, promesa d’un futuru resplandorientu.
Un periodista d’‘El Imparcial’ escribía en 1902, alrodiu de la visita covadonguina d’Alfonso XIII, que si Cuadonga yera «testimonio petrificado de la historia», Xixón yera, sicasí, la «encarnación palpitante del progreso». Al añu siguiente, Álvaro de Albornoz empondera nun mitin l’Asturies «del trabajo y del progreso, simbolizada en las fábricas de Gijón y en las portentosas industrias de Langreo y Mieres», frente a «la Asturias legendaria de Covadonga». Y Ortega y Gasset pensaba de xuru en Xixón cuando dicía: «España necesita también de vuestro regionalismo. Porque tengo enorme fe en ese regionalismo asturiano. El regionalismo que hay que oponer a aquellos otros sin claridad, lastrados de arcaísmos nacionalistas. Será vuestro regionalismo, no del pasado, sino futurista. Por lo tanto, nada de trajes tradicionales, nada de folklore, nada de bable, nada de gaitas, sino una Asturias posible y mejor: una Asturias como programa del porvenir».
Xixón taba n’Asturies y al empar nun taba n’Asturies; la ciudá yera un cantón, ‘El cantón milenario’ del qu’escribía Pedro de Silva. Y un modelu, y un puntal. Un llugar distintu del restu d’Asturies, pero que la impulsaba, que l’animaba a emulalu. Tenía la clas obrera que tamién teníen les cuenques y Avilés, con tolo qu’eso significaba, pero, amás, tenía’l cosmopolitismu de la ciudá grande y portuaria. Pasábanos lo qu’a Vigo, gallega pero non mui gallega; enserta n’un tarrentoriu más grande, pero con más frecuencia enserta namás qu’en sigo mesma; nel so arguyu singular, particularista. Nun hai poca xente, yo conózola, que nun se siente mui asturiana, pero sí mui de Xixón. L’arecismu foi el nuesu abelcaballerismu.
Yera habitual, tamién, falar del contraste con Uviéu, la Vetusta provinciana y conservadora. La xirigata de que n’Uviéu trunfen los diminutivos (el Campillín, Oviedín…), y en Xixón los aumentativos (El Molinón, La Escalerona, La Iglesiona…), escondía daqué más qu’una casualidá cola que chinchar a los xixoneses, colgándonos el sambenitu de grandonos. Daqué había, y podía ser risible o ser formoso. El grandonismu ye la forma pedestre, o la manera peyorativa de referise, al cosmopolitismu; a una aspiración noble a los horizontes abiertos.
Enunciar esos contrastes, falar de la esistencia de dos Asturies, y d’una Asturies xixonesa distinta del restu, dexó de ser habitual porque dexó de ser creíble. Xixón ya nun ye distintu. Yá nun hai una Asturies que caltién y otra que crea, nin una Asturies tradicional y otra futurista, nin una Asturies que cunta batallines mientres la otra víveles. Tolo asturiano ye, agora, igual de bono, de malo, de regular o de neutro; unificóse too. Baltáronse les muries del cantón. Xixón yá nun ye una alternativa, yá nun ye indie. Tampoco hai una Asturies agraria y otra industrial. Hai llabradores y hai industria, pero son detalles, esceiciones, notes al pie, non una sociedá completa perviviendo. Esiste namás l’Asturies turística, y la so capital ye Xixón, qu’entós yá nun puede axudicase a sigo mesma los axetivos de disidente o heterodoxa. Xixón, agora, ye la ortodoxia, la norma, el patrón; modelu, sí, pero de lo oficial, del orde establecíu. Lo cual nun ye, per se, nin bono, nin malo. Pero ye.
