Xuegu de promos

Nun son poques les polémiques que pudimos ver nesta llexislatura, que paecía diba ser tranquila na vuelta’l PSOE al poder municipal na ciudá

Como col slogan aquel de Pablo Iglesias que tanta polémica creó —esi VuÉLve grandón qu’abultaba airones de cesarismu—, nos últimos díes na villa de Xovellanos hai un ruxerrux col regresu de la que fuere alcaldesa durante ocho años, la primer rexidora que nun pertenecía a la FSA, Carmen Moriyón. La ciruxana xeneral acolumbra dende’l mirador de La Providencia, nel so videu promocional, un horizonte distintu, soleyeru, d’aire vieyo y golor a 2011, pero que remocique dafechu estos años de xestión d’Ana González. Al ritmu de Bruce Springsteen, ún de los últimos grandes artistes qu’aportaron gracies al trabayu municipal, Moriyón preséntase como la solución a los problemes que surdieron estos cuatro años, sobremanera na estaya urbanística, y que dividieron a la sociedá xixonesa en dos. Nun son poques les polémiques que pudimos ver nesta llexislatura, que paecía diba ser tranquila na vuelta’l PSOE al poder municipal na ciudá; sicasí, énte unu de los momentos más difíciles qu’un gobiernu pudiere vivir —la pandemia de la covid-19— les decisiones que se llevaron alantre nun paez que gustaren a gran parte de la población. 

Les eleiciones municipales, que van celebrase en mayu de 2023, nun van tener el cara a cara ente les alcaldeses que tanto naguamos; los militantes socialistes escoyeron hai meses a otru candidatu a l’alcaldía (Floro) y a un nuevu secretariu xeneral nun espolín que baltió les coraes del socialismu asturianu. L’escenariu que se plantega agora na política xixonesa nun ta del too nidiu: ye previsible que Ciudadanos desapaeza de la corporación municipal y seya’l PP quien recupere gran parte d’esi terrén; Foro, cola apaición estelar de Moriyón, tien de recuperar gran parte del electoráu que perdió nos últimos comicios con un candidatu ensin atractivu (polo menos, políticu); Izquierda Xunida, qu’apostó pol alcuerdu col PSOE estos cuatro años, yá ensin Aurelio, quiciabes resista (n’Asturies ye mui necesaria entá); Podemos alcuéntrase nuna situación que nun imaxinaba hai seis años cuando taba a piques de comer el mundu; Vox algama una posición importante nel tableru y nun paez que ceda espaciu.

Asina que’l xuegu de tronos, como solemos dici-y agora a tou movimientu y cambiu de cromos políticos, ta en marcha y nós tamos preparaos pa tolo que tenga que venir.